Амралтын өдөр замд гарч раажав хүүтэй нөхөрлөлгүй, ойр зуурын ажлаа амжуулж, гэрт бодол сэтгэлээ амрааж, хааяа зурагт харсан шиг өнгөрөөв. Ямартай ч ирэх нэгдэх өдрөөс 48 мужид бизнес нээгдэх юм байна. Шинжилгээний асуудал хангалттай биш болохоор хоорондын зайгаа барьж, халдвар авахгүйн төлөө голио азаа үзэх цаг иржээ. Трамп Ерөнхийлөгчийн өчигдрийн мэдэгдлээр бол оноос өмнө корона вирусын вакцинтай болж амжих юм байна. Хэрвээ тэр амны бэлгэ биелэлээ олбол түүн шиг сайн хэрэг юу байх билээ. Олон эрдэмтний санал санаачлагыг харгалзаж үзээд ортой үг хэлж буй хэмээн итгэнэм.

Улс орнууд эдийн засгаа хөдөлгөж эхэлснээсээ хойш шинээр гарч байгаа халдваруудаа хэрхэн хэмжиж, илрүүлж, хянах тал дээр өөр өөр арга барил баримталж байна. Хонгкон, Тайван, Солонгос, Польш зэрэг улсад халдвар авсан, эсвэл халдвартай хүмүостэй харьцсан тохиолдолд засаг захиргаанаас хөл хориог баримталж байгаа эсэхийг хянах аппыг гар утсан дээрээ заавал суулгахыг шаардаж байна. Америкт бол сайн дураараа гэж байгаа. Вашингтон пост сонины санал асуулгаар оролцогчдын зөвхөн 40% нь тийм апп суулгах боломжтой эсвэл суулгана гэж хариулсан бол тэн хагас нь хүмүүсийн нууцлал мэдээллийг хамгаална гэдэгт технологийн компаниудад итгэхгүй байна гэжээ.

За жар хоног. Ийм нэртэй ном байдаг билэв үү? Тэмдэглэлээ ном болгочих уу? Үгүй ээ, наргисан хэрэг. Ном гэдэг болбоос хүмүүний мэдлэг боловсролд тус дэм болох эрхэм зүйл. Над шиг араажавын аливаа янзын бурааг хураасан юм хэрхэн ном болох билээ. Хоёр сар ч чухам бага хугацаа биш. Энэ хооронд зөндөө л юм болоод өнгөрлөө. Манай нэвтрүүлэгтэй хамт байсанд баярлалаа гэдэг шиг Бичснийг маань цаг гарган уншиж ирсэн та бүхэнд баярлалаа.

Ажилгүйдэл бол аж амьдралаа алдахын үүд болсон айхтар том гамшиг юм. Цар тахлын улмаас орон даяар хөл хорио тогтож, том бага бизнесүүд шил дараалан зогссоноор олон арван сая хүн ажилгүйчүүдийн эгнээнд шилжжээ. Одоогийн байдлаар Америкт 36.5 сая хүн ажилгүйдлийн тэтгэлэг хүссэн өргөдлөө өгсөн байна. Хүсэлтээ гаргаж чадахгүй, бас амжаагүй яваа олон сая хүн цаана нь бий. 330 сая хүний 170 сая нь ажилладаг гэсэн тул тэдний 20% нь тэтгэлэг хүсээд, ажилгүй сууж байна. Ниргэсэн дээр нь нэрмээс болж, тэр 33.5 саяас 27 сая нь эрүүл мэндийн даатгалаа алджээ. Америкт маш өндөр үнэтэй эрүүл мэндийн даатгалын бараг гуравны хоёрыг ажил олгосон пүүс компани даадаг нэг сонин нийгмийн тогтолцоотой билээ. Миний сард төлөх эрүүл мэндийн даатгал нь 850$ байлаа гэхэд өөр дээрээ эхнэр хүүхдээ нэмж оруулаад, гэр бүлийн даатгал 2550$ болох агаад түүний зөвхөн 850$-ыг би өөрөө, 1700$-ыг манай компани төлнө гэсэн үг. Үүнийг цалингаас илүү ашиг (benefit) гэж үздэг. Тэгэхээр ажил төрлөө алдахаар энэхүү ашиг давхар алга болно. Ажилгүй л болвол эрүүл мэндийн даатгал 60 хоногийн дараа хаагдчихна. Энэ хооронд ажилгүй болсон хүн арга замаа хайх хэрэгтэй. Ажилгүй болсон хүн Кобра хэмээх даатгалд өргөдөл бөглөх боломжтой боловч үнэтэй тул тэр болгон энэ даатгалыг авч чаддаггүй. Цар тахлын энэ бэрх үед 2 сарын дотор шинэ ажил олох тийм амар биш. Тэгэхээр ажилгүй л бол эрүүл мэндийн даатгалгүй болох эрсдэл үүснэ. 2 сараас дээш ажилгүй байх тохиолдолд Медикал хэмээх эрүүл мэндийн даатгалд өргөдөл бөглөж болдог боловч цар тахлын энэ мөчид нөхцөл байдал хэрхэн өөрчлөгдөж буйг мэдэхгүй байна. Манай мужид бол 65-аас дээш насны бичиг баримтгүй хүмүүс Медикал авах боломжтой боллоо гэсэн.

Өдөр хоног өнгөрөх нь бараг гэрлийн хурдаар л гялалзаж, нэг л мэдэхэд долоо хоног дундаа орчихлоо. Машиндаа элдэв үйлчилгээ хийлгэх хооронд түр зээлдүүлсэн шинэ тэргийг унаж, замын уртыг урамтайхан эвхэж хэд хонолоо. Цагийн байдал улам л ороо бусгаа болж, олон асуудал хуурай өвсөнд авалцсан түймэр мэт хаа сайгүй дэгдсээр байна. Хяналтаа сулруулсан Хятадын Ухань хотноо цар тахал буцаж ирээд, 11 сая хүнээ шинжилгээнд оруулах болжээ. Хоригоо цуцалсан Солонгост шөнийн цэнгээний газраас корона вирус дэгдэж, бас л дээр дооргүй сандарцгаажээ. Орос орон халдварын тоогоороо дэлхийд 2-т буюу Америкийн дараа жагсах болов. Америкийн халдвар судлалын гол эксперт Антони Фаучи эмч алсын зайнаас Конгрессод байцаагдахдаа "Эдийн засгаа эрт нээх нь эрсдэл дагуулна. Урьдаар бэлтгэл сайн хангах хэрэгтэй" гэж үнэн үгээ өчив. Оосор бүчгүй энэ орчлонд Америкийн ихэс дээдэс яахаа шийдэх л үлдэв.

Оройн мэнд. Шөнийн мэнд.

Өнгөрсөн хагас сайнд нийт дэлхийн хэмжээнд вирусын халдварын тоо 4 сая хүрлээ. 4/27-д 3 сая. 4/15-д 2 сая хүрсэн. Тест шинжилгээ өгөх боломж сайжрах тутам үүнийг дагаад халдварын тоо улам нэмэгдэнэ. Тэгэхээр тест ховор байх тусмаа улсуудыг бага халдвартай харагдуулна тиймээ?

Шинэ халдварын тоо баруун Европид багасч, харин зүүн Европ, Африк, Зүүн өмнөд Ази, газар дундын тэнгисийн зүүн хэсгээр нэмэгдэж байна.