Майн баярын цас, шороотой хуйсгануур өдөр бид туг лоозон бариад, гар хөлөө бээрүүлэн барин, ёстой нусан дарцаг болж жагсдаг байж билээ. Даян дэлхийн үгээгүй ядуус нэгдэгтүн! Майн нэгэн мандтугай! Мао Цэдүн сөнөтүгэй! Манай сургууль хөгжтүгэй! гээд амандаа орсныг орилж, аль болох зугаагаа гаргадаг байв. Мао гэснээс мориор сургуульд явдаг байсан намрын нэг сэрүүн өдөр хичээлдээ иртэл ангийн багш маань "Өнөөдөр Мао Цэдүн үхсэн, хичээл орохгүй, та нар чөлөөтэй тоглож болно" гэж хэлж, магнай хагартал баярлуулж билээ. Түүнийг ер мартдаггүй юм. Олон улсын ажилчдын баярын энэ өдөр манай энд зайлшгүй ажиллах шаардлагатай хүмүүс ажлын нөхцөл, цалин хөлсөө сайжруулахын төлөө жагсаал хийнэ гэнэ. За ингээд их зохиолч Д.Нацагдоржийн адил Майн нэгнийг хөрөнгөтний газар үзэх нээ. Түүнийг Германд сурч байснаас хойш бараг 100 жил өнгөрсөн ч ядуусын тэмцэл яг хэвээрээ байна уу даа.

Солонгос улс хатуу хөл хорионы дараа дүрэм журамтайгаар нээгдэж эхэлжээ. Уулзалт хуралд оролцогсод бүгд маск зүүх ёстой, ресторанд хоол идэхдээ ширээнд зэрэгцэж эсвэл зиг заг хэлбэрээр солбиж сууна, зочныг гарсны дараа зочид буудлын өрөөг 15 минут агааржуулах, зоо парк, аквариумд хүмүүс бие биеэсээ 6 алхам зайтай байх гэхчилэн бараг бүх зүйлд дүрэм гаргажээ. Өнгөрсөн 4 дэхэд христийн сүм үйл ажиллагаагаа эхэлсэн ба бүх хүн маск зүүх, дараа нь мөрлөж тогтоохын тулд ирциыг нариын саын бүртгэх заавар өгчээ. Хүүхдийн сургуулиуд хаалттай хэвээрээ байна. Олон зааврыг ч Солонгосчууд үг дуугүй сайн дураараа сайн мөрдөнө дөө.

За ингээд өнөөдөр 4 сарын сүүлчийн өдрийг мушгилаа. Цаг хугацаа мөн хурдан өнгөрч байна аа. Гэрийн хорионд суугаад нэг л мэдэхэд сар хагас болчихжээ. Энэ хооронд Америкт их олон юм өөрчлөгдөж, бид ч түүхийн нэг гэрч болон үлдэв. Бусдын нутагт ямагт дайн хийж явсан америкчууд нутагтаа үхэл зовлон амсаж, Вьетнамын дайнд алдсан залуусынхаа тооноос цар тахалд үрэгдэгсдийнхээ тоогоор давчихлаа. Тэгэхээр энэ цар тахал нь нүдэнд үл үзэгдэх дайсантай тулалдаж буй жинхэнэ дайн юм. Тус дайнд өртсөн хүрээ нь 5 тивийн хэмжээтэй өргөн болж хувирав. Цар тахлын царыг би цар хүрээний цар (үлэмж их) гэж ойлгож байна. Нэг судлаач түмпэн савны цар гэж нэрлэх нь буруу хэмээн яриад байсан.

Өнгөрсөн хагас бүтэн сайнд дулаахан сайхан байсан тул манай Калифорни мужид олон хүн далайн хөвөө явж, биич дээр амарч өнжихдөө хоорондын зайгаа бариагүй ажээ. Үүнд мужийн захирагч Гэйвн Ньюсом нэлээд дургүйцэж, "Корона вирус хагас бүтэн сайнд амраад, гэртээ харьчихна гэсэн юм байхгүй. Дулаарлаа гээд алга болчихгүй, корона вирус бидэнтэй хамт байгааг үргэлж санах хэрэгтэй" гэж хатуу анхааруулав. Сан Франциско хотын дарга Лондон Брийд 5 сарын 4 буюу ирэх нэгдэх өдөр цуцлах байсан гэрийн хориог 5 сарын 31 болтол сунгаснаа зарлалаа. За ингээд ахиад нэг сар гэртээ суух нигууртай боллоо. Гэрийн хорио нь Бэй Аэриад цар тахал хүчтэй дэлгэрэхээс сайн хамгаалж, үр дүнтэй болж байна. Гэхдээ айхтар өвчин газар авсаар буй тул нутаг, хэл ус нэг андууд минь хэрхэвч назгайрч болохгүй шүү.

SFO онгоцны буудлын баруун хаяагаар тойрч өнгөрөх 101-р хурдны замаар би өглөө бүр давхидаг билээ. SFO бол Сан Франциско хотын нисэх онгоцны буудлын нэр, SF нь хотын нэрийн товчлол, О нь нисэх буудлын код болно. Лос Анжелесын нисэх онгоцны буудал нэр нь LAX байх жишээтэй. Мандах нарны гялбах туяанд олон онгоц газардахыг завдан агаарт шувууд мэт зэллэн харагддагсан. Өнөөдөр энхийн хөх тэнгэрт торойх ч нэг онгоцгүй эл хуль, нам гүм харагдав. Цэлмэг тэнгэрийн төмөр шувуудыг цар тахал залгисан гэлтэй. Цөөхөн нислэгтэй болж, шөнө дөлөөр хэдхэн онгоц хөөрдөг ажээ. Урьд шөнө Солонгосын онгоцоор хэдэн хөгшин Сөүл рүү ниссэн дуулдав. Гадаадад гацсан олон монголчуудаа чадал чинээгээр татсаар буй байнгын нислэгтэй газруудын нэг нь Сөүл хот болно.

Ажлын өдөр эхэлж, раажав хүүтэйгээ ахиад нөхөрлөв. Раажав хүү маань хоцрогдсон технологийн үлдэгдэл "хуучин хүү" мөн тул тэнгэрийн хаяанаас наашихыг л сайн бурж, тэртээ улсуудын мэдээг барин тавин хэлдэг юм. Ойроор нь орон нутгийн мэдээг чих тавин жаал сонсож явлаа. Тэтгэлэг, зээлээр олгох 350 тэрбум доллароос гэрийн хориотой Калифорни мужийн жижиг бизнес эрхлэгчдийн зөвхөн 15% нь хишиг хүртсэн байхад гэрийн хорио зарлаагүй Хойд ба Өмнөд Дакота, Небраска, Айова мужуудын жижиг бизнес эрхлэгчид 50-60%-ийн хишиг хүртжээ. Энэ бол ариун явдал бус гэнэ. Учир нь тэтгэлэг, зээлийг корона вируст өртөж, гэрийн хориогоор хаагдсан жижиг бизнесүүдэд зориулсан болохоос огт хаагдаагүй жижиг бизнест өгөх ёсгүй байжээ. Тэтгэлгийн мөнгийг хуваарилж буй хүмүүс ажлын амрыг бодож, нарийн шалгалтгүй хэн түрүүлж өргөдөл өгсөнд нь тараасан байна. Тэднийг эргээд шалгах гэхээр мужаас нь улс төрийн дарамт шахалт үүсээд, ихээхэн төвөг учирч байна гэнэ. Тэтгэлэг, зээл авалгүй хохирч буй нь корона вируст ихээр өртөж, гэрийн хорио тогтоосон Ардчилсан намд ихэвчлэн санал өгдөг мужууд, завшиж хожсон нь корона вируст бараг өртөөгүй, гэрийн хорио ч зарлаагүй Бүгд найрамдах намд саналаа өгдөг мужууд ажээ. Энэ замбараагүй байдлаас болж асуудлыг давхар улс төржүүллээ хэмээн зарим хүн Трамп Ерөнхийлөгчид дургүйцлээ илэрхийлжээ. Дайны хажуугаар дажин гэгчээр тэр мужууд хууль дүрмийн түүхий заалтыг овжин ашиглаж, бусдын боломжийг өрсөн завшиж, "би үхэхээр чи үх" гэсэн үзэл санаа гаргаж, хямарсан дээр нь хямруулж орхив гэнэ. Ийм хөгжилтэй, баян том оронд тийм муухай хандлага гарч байгаа юм чинь буурай хөгжилтэй орнуудад алаан болох нь аргагүй биз ээ. Шар мэдээнээс дам сураг сонсвол замбараагүй байдал гарч магад гэж үзээд, Хятад улс Африк тивд буй цэргийн баазуудаа зузаатгасан ажээ. Том гүрнүүд тив дэлхийд нөлөөгөө алдаагүй гэж бас л улайрч байна.