Амралтын өдөр раажав хүүгээ сонсолгүй хоёр чихээ амраав. Хол ойрын сониныг ч хайсангүй. Бодол бэлчээн ном шагайж хэвтэв. Улаан өндөгний баярын өдөр болохоор гадуур дэлгүүр хоршоо хаалттай, хүн хар цөөн, хөл ихэд татарсан байна. Америкчууд гадуур салхилахдаа ер нь маск зүүж дадах янзгүй харагдана. Сураагүй юмыг ч сураар боож бас болохгүй бололтой. Монголд маань хавар ирж дулаараад, хүмүүс ч бас маск зүүхээсээ тээр шаах болжээ. Маск зүүх нь зөвхөн энэ цар тахлын тархалтаас хамгаалах төдийгүй олон төрлийн ханиад томуу, халдварт өвчнөөс өөрийг болон өрөөлийг хамгаалах болно. Освенцимийн хорих лагериас маскийн ачаар оргож гарсан эмчийн тухай нэгэн яриаг дурдаж хэлье.

Амралтын өглөө хоол хошоо базааж татахаар хүнсний дэлгүүр рүү шогшлоо. Цагаан хүмүүсийн хороололд буй цаанаа нэг цэвэр цэмцгэр хүнсний дэлгүүрт давхиж хүрэв. Хүмүүсийг 2 метр зайтай зогсоох тул дэлгүүрийн гадна бага зэргийн дараалал үүссэн байлаа. 10 хүнээр тасалж оруулахад, удаж төдөлгүй дэлгүүрт нэвтрэв. Бараа таваар урьдын адил элбэг дэлбэг, хүмүүсийн харьцаа найрсаг тайван хэвээрээ, ихэнх хүн маск зүүснээс өөр нэг их өөрчлөгдсөн юмгүй байна. Нойлийн цаас хүний нэг боодлыг өгч байна. Нэг боодол дотроо 9 ширхэг, үнэ нь 18$ болсон ажээ. Үнэ нь хуучнаасаа 3 дахин өссөн байна. Саяхан л Костко бөөний төвд 48 ширхэгтэй, бас ширхэг бүр нь 2 дахин их орцтой цаасны үнэ 18$ байсан даа. Ямартай ч нойлийн цаас хаданд гарч, үнэ нь ийнхүү ихэсчээ. Бусад хүнсний зүйл жаахан нэмэгдсэн байна. Жишээлбэл 3.70$ үнэтэй 1 галлоны хэмжээтэй витамин Д, цөцгийтэй сүүний үнэ 5$ болжээ. Би урд өмнө 120$ орчим үнэтэй хүнс цуглуудаг байсан бол олоо өсөөд 180$ хавьцаа болж байна. Нийтдээ хүнсний үнэ энэ дэлгүүрт л лав гуравны нэгээр өсчээ. Энэ байдлаараа 2 сарын дараа бараг үнэ нугарч магад. Цар тахлын нөлөөнөөс болоод хүнсний хангамж, түгээлт, борлуулалт зэрэгт өөрчлөлт гарч буй хэрэг. Эмээ маань дайны үед цай тамхи ховордож, боодол дүнзэн тамхи нэг хонь, дугуй булантай ногоон цай нэг морьтой дүйцэж байсан гэдэгсэн.

Түрүү жилийн бичвэрээ орууллаа шүү. Зарим хүмүүс олохоос залхуураад байх шиг байна хэ хэ.

Талхны машинтай айл хэр олон байна? Юу юу хийхэд ашигладаг вэ? Танайх талх тогтмол иддэг бол талхны машин авчихвал хөдөлмөр хөнгөлнө, дээр нь элдэв орцгүй гэрийн талхны амт нь хамаагүй гоё. Bread maker гээд ямар ч брэндийнх байж болно. Бараг л бүгд адилхан.

Цагийн байдал хүндрэх тал руугаа хазайж, өдөр бүр өөрчлөгдөж байна. Цар тахлын халдвар зүүн эрэгт тун хүндэрч, баруун эрэгт тогтоон барихыг хичээж байна. Халдвар авсан хүн ихсэхээр эмнэлэгт буй халдвар аваагүй хүмүүсээ хамгаалах асуудал хүндэрч байна. Хятад улс эл асуудлыг шийдэхдээ зөвхөн корона вирусын зориулалтай эмнэлэг байгуулж амжилтад хүрсэн. Америк тийм зорилт тавиагүй болохоор мэс засал хийх, үр хөндөх гэх мэт ажлаа хойшлуулж, бүх нөөц бололцоогоо корона вирустэй тэмцэхэд чиглүүлж, эмнэлгээ холимог өвчтөнтэй хэвээр байлгахаар тогтон ажиллаж байна. Хиймэл амьсгалын аппарат ажиллуулах мэргэжилтэн хүрэлцэхгүй байгаа тул эмнэлгийн ажилчдын дунд хурдавчилсан сургалт явуулж байна. Халдвар авсан өвчтөнтэй эмнэлгүүд тусгаарлалтын нарийн горимд шилжсэнээс болж, хэвтэж эмчлүүлж байсан хүмүүс эрсдэлтэй болж байна. Нэг үхрийн эвэр дэлсэхэд мянган үхрийн эвэр доргино гэгчээр өөр хоорондоо хамааралтай хямрал үүсэж байна.

Америкт 2 дахь өдрийн оройн 8 цаг гэхэд 24 цагийн дотор 1939 хүн бурханы оронд явчихлаа. Энэ нь өмнөх өдрүүдээс тооноос 50%иар илүү байгаа юм. New York, Illinois, Louisiana, New Jersey 4 мужид үхлийн тоо өмнөх өдрүүдтэй харьцуулбал хамгийн өндөр байлаа. Өчигдрийн 5 цагийн байдлаар 425 орчим мянган халдвар, 14.5 мянган үхэл, 23.3 мянга орчим эдгэрэлт бүртгэгджээ. Үндэстэн дотроос Африк америкчууд ихээр өртөгдөж байна гэж яригдаж байгаа. Жишээ нь тэд New York-ийн хүн амын 28% боловч үхлийн 71% байх жишээтэй. Эмнэлэг, үйлчилгээ хүрдэггүй энэ тэрээс үүдэлтэй гэж байгаа ч эрүүл мэндийн ерөнхий байдал нь тухайлбал зүрх судас, таргалалт, саахарын өвчтэй хүн ихтэйгээс болж байгаа байх даа хөөрхий.
ДЭМБ-ийг Шар маань Хятадад үйлчилдэг, олигтой ажилладаггүй гээд хэлээд авлаа. Уг нь Америк хамгийн гол санхүүжүүлэлт буюу 400 гаруй сая долларыг 2019 онд өгсөн бол Хятад зөвхөн $40 саяыг өгсөн нь ч хятадын ЗГ илүүтэй энэ байгууллагын удирдлагад нөлөөлж байна гэж үзжээ. 1/14-д ДЭМБ төлөөлөгчид хятадад очоод “хүнээс хүнд дамждаг гэсэн цэвэр баталгаа алга” гэж Бээжингийн мэдэгдлийг давтсан, 2 долоо хоногийн дараа 4500 гаруй хүн өвчилсөн байхад захирал нь очоод Хятадын ЗГ-ыг сайн ажиллаж бна гэж магтсаар буцаж иржээ. Яг үнэндээ Хятадын ЗГ хүмүүст анхааруулсан эмч нарыгаа шийтгэж, 6 долоо хоног хүлээж олон улсад мэдэгдсэн. Энэ захирал ч авахуулах нь тодорхой хөөрхий. Өөр нэг зүйл гэвэл энэ их шуугианы үед Шар сар болон бусад гаригуудын түүхий эдийг ашиглах талаарх executive order тусгай захирамжид гарын үсэг зуржээ. Дэлхийгээ ухаад, дээр нь сар, бусад гаригийн хойноос шуналтахнээ бид.

Албан тасалгааны цонхоор... гэдэг шиг авто машины цонхоор манан суусан модтой нуруу жирэлзэн өнгөрнө. Миний нутгийн уулстай ихэр мэт адилхан харагдах энэ нуруу ч яахын аргагүй хүдэн татаж униартсан хүний нутгийн хангай юм даа. Уулын замаар давхих бүрт хүдэнтэж, манан татсан Баарай, Баянзүрх, Өвт, Орхоны хөндий тэр чигтээ сэтгэлд бууж, нутагтаа морин дэл дээр дарцаглаж яваа мэт сайхан мэдрэмж төрдөг билээ. Замын уртыг эвхэхэд үерхэлдээ чин үнэнч раажав хүү л хань болж байна. Ертөнцийн сонинг базаж аваад, чих рүү шиддэг тул би юунд уйднам бэ.