Өглөө зам дээр гараад л раажав хүүгээ цаг хагас сонслоо. Цар тахлын тухай ердөө ярьсангүй. Арьс өнгөөр ялгаварлан гадуурхахтай холбоотой хүн амины хэргээс үүдсэн, энд тэнд болж буй жагсаал цуглаан, тонуул дээрмийн тухай арвин зүйлийг эрүү хамхилгүй ярьж байна. Зарим газар цагдаа нар босогчдыг дарж чадахгүй дотоодыг хамгаалах цэрэг дуудаж, зарим хотод оройн 8 цагаас өглөөний 5 цаг хүртэл хөдөлгөөнийг хязгаарлаж, нэг есондоо комендантын (эргүүлийн) цаг тогтоолоо. Сан Франциско хотод мөн ийм дэг тогтоов. Учир нь хотын төвийн үнэтэй дэлгүүрүүдийг шөнө дөлөөр отож байгаад зорилготой хүмүүс талсан тул ингэхээс өөр аргагүй болжээ.

Амралтын өдрүүд эхэлсэн ч жагсаал цуглаан, бослого тэмцэл газар сайгүй гарч буй тул замд боогдох, заавал нэгэн байдлаар саадахаас эмээж, гэртээ дуртай юм аа хийгээд өнжихөөр шийдэв. Цар тахлаас болоод гэртээ хоригдож бухимдсан олон түмний хурсан хорсол заналыг нэгэн тэнэг цагдаагийн хийсэн хүн амины хэргээр асааж, эмх замбараагүй байдал үүсээд, хуурай өвсөнд дэгдсэн түймэр мэт газар авч байна. Нэг үхрийн эвэр дэлсэхэд мянган үхрийн эвэр доргино гэдэг энэ билээ. Энэ удаад раажив сонсож, зурагт ширтэлгүй бие сэтгэлээ амраах гэсэн болохоор Монголд болох гэж буй сонгуулийн талаар санал бодлоо бичье. Сонгууль маргаангүй явж, сойсон морьдынхоо хурдаа үзэх нь мэдээж билээ.

Хэд хоног хурц нартай халаад авсан болохоор өнөөдрөөс эхлээд үүгээр манан татаж, гэнэт сэрүүн ороод ирлээ. Хагас бүтэн сайн өдрүүдэд бороо орох сураг байна. Борооны улирал аль хэдийнээ дууссан байхад ийнхүү борооших нь бузрын нян тахлыг байгаль дэлхий хүртэл мэдэрчихээд ариутган угааж буй ч юм билүү. За тэр ч яах вэ, замын уртад раажав хүү л хань болж явна.

Сайхан Монгол орны саран гоо ээжүүд, ирээдүйд Монголын заяаг тээх бум буман хүүхэд багачууддаа эх үрсийн баярын мэнд хүргэе! Хүүхэд залуус минь өв соёлоо дээдэлсэн, эх орондоо элгэн халуун хайртай хүмүүс болно хэмээн итгэл төгөлдөр бодож явдаг билээ. Амралтын өдрүүд Америк оронд үймээн самуунтай болохоор гэр зуур сайхан амарч өнгөрүүллээ. Цаг заваа ашиглаж, Өвөр Монголын Одон телевизийн олон сайхан баримтат киног угсруулж үзлээ.

Америкийн нийгэм цар тахлаас үүдээд гангар шаазан мэт хэврэг болсныг Миннеаполисын жагсаал цуглаан, тонуул дээрэм, эмх замбараагүй байдал бүрэн харуулж байна. Ажилгүй болсон нэг хар хүн өлсөхийн эрхэнд хүнсний дэлгүүрт хуурамч 20-тын дэвсгэрт хэрэглэх гэж баригдаад, ухамсар мөчид, арьсны үзэл нь гаарсан цагдаа нарын гарт алтан амиа алдаж, хар арьстнуудын хилэнгийн дөлийг бадрааж, жагсаал цуглааны галыг өрдөж, эцэстээ эд хөрөнгө, эрүүл мэндийн их хохирол амсав. Гайтай цар тахлын гэрийн хорионы нэгэн сүүдэр нь энэ болно. Сошиал хөгжсөнөөр урд өмнө дараад өнгөрдөг байсан эмгэнэлт явдлуудыг нийтэд ил тод болгожээ. Трамп Ерөнхийлөгч хүртэл тавтиргүй хэл амнаасаа болж Твиттер компанитай элдвээр алалцах боллоо.

Цар тахлын хажуугаар оосор бүчгүй энэ орчлонд олон гайхалтай үйл явдал болоод өнгөрч байна аа. Трамп Ерөнхийлөгч "Шуудангаар саналын хуудас бөглөхөөр залилангийн шинжтэй хуурамч сонгууль болно" гэж жиргэжээ. Түүнд нь Твиттер компани автоматаар "худал мэдээлэл" гэсэн анхааруулгын шошго наачихжээ. Сарын өмнөөс худал хуурамч мэдээлэлтэй тэмцэнэ гэж тус компани зарлаж байсан юм. Хуурамч мэдээллийг ерөнхийлөгч байна уу, ердийн иргэн байна уу, хэн тараах нь хамаагүй, нэг л хэмжүүрээр хэмжиж ийм анхааруулга наасан байна. Түүнд нь ноён Ерөнхийлөгч давчдаж, тус компанийг хаалгана гэж сүрдүүлэв. Твитер даруй хаагдвал Монголын сонгууль харин хар пиаргүй явах юм биш үү.